Poeten durchsuchen

D'Kindheit und dö andanö Zeit Wann i so z'ruckdenk,. wia's früher wohl woar, Beinand mit dö Gschwister, a gmiatlichö Schar Da Vata und d"Muata ham g'sorgt sö um ins, dass ma z'essn gnua gehabt ham und a Betterl, a linds. Dös Lebn woar anders, nöt grad so wia heit. Wia ma hält so sagt, ganz a andane Zeit. Am Samstag auf d'Nacht, drinn in da Stubn hama Rosenkranz bet', auf dö Knia, und frumm woarn ma a nöt grad oiwei so richtig dabei, wann s'Wöda recht sche g'wön is draußen, im Mai. Da Vata hat hergschaut und ins woar kloar, da Rosenkranz is ja nu oiwei nöt goar ! Dö Knia ham so brennt, ma g'spürts fast nu heit. Wia gesagt, es woar a andanö Zeit Überfluss hat's damois a nu koan göbn. Zufriedn und bescheidn, so woar insa Löbn. Da Schuiweg soooo lang Und stoanig dazua. Wia dö Gams hama g'sprunga, mit Freudn, ohne Schua. Über Wiesn und Anger, über Stock und Stoa. Dö Welt, hama gmoant, steht fia ins ganz alloan. Da Stoanabach hat ins von weitm scho kennt . Am liabstn hätt er ins beim Nam' oisand g'nennt. D'Schui woar fia ins da und nöt umgekehrt. Z'wegn dera deppatn Schui hama iawad a g'reart. Aber mia ham ins sölbn tröst und Muat wieda gemacht. Dahoam hama nix g'sagt, da hättn's grad glacht. Mia ham ins hoit denkt, ös wird ins nöt bang. S'Schimpfn tuat nöt weh und d'Schläg dauern nöt lang. Oa Häuserl am Schuiweg, dös vogöss ma goar nia. Oi Tag hama ei durch dö offene Tür. D'Großmuata hat g'woart tagaus und tagein. So besorgt kann ja deat grad a Großmuata sei. "Kemmt's ", hat's gern g'sagt, "toat's a wengerl was essn!" Großmuata, gar nia wern ma dir dös vogössn. An Grabnland obn, wia kunnt's anders sei, hama haufnweis Schwammerl prockt, eini in d'Rein. Und Schwarzbeer und .Himbeer, ös is fast zum Lacha, hama hoamtragn da Muata für'n Kuchn zum Bacha. Da Aufstieg zum Lackaberg, der woar steil und hoart. Da Jagastand oben hat auf ins oiwei g'woart. Dort hama dann g'sunga, mehr laut ois wia sche, am liabstn tat ma heit nu zum Lackaberg aufigeh. Ös woar oafach sche dahoam bo dö Leit . Tief drin is' voankert, dö andanö Zeit. Badn hama ganga fast jeden Tag. Zur Zeller Ach' umi. Für ins woar's koa Plag. Dö Luft woar so rein und s'Wassa so kloar. So wird's nimma sein wia's oamoi woar. Und Weihnachtn hätts koanö schenan nöt göbn. An Christbam, an kloan, voi aufputzt mit Friedn. An Stall draußt, wia woar dös Wartn so lang! Voi Sehnsucht hama um's Christkindl bangt. G'stricktö Söckö und Handschuah und a was zum Essn, oamoi unterm Bam a Büachö zum Lesn. Für ins woar's gmiatlög und d'Stubn so woarm. Geh ! S'Christkindl woar damois do sölba so arm ! Beim Stille-Nacht-Singa dö Herzn so weit . Oamoi, wann's nu kamat dö selige Zeit ! A glückligö Kindheit, was kann's schenas nu göbn? Ös is ja da Anfang, da Anfang vom Löbn. Aber da Zoaga der Uhr, der bleibt hoit nöt steh Dö Jugend vogeht, und wär's nu so sche. Ma kimmt ausananda, roast aussö in d'Weit. Vo dahoam bist iazt weg. Du kennst andanö Leit. Dö ganz' Welt, kimmt da via, dö g'hert iazat dei. Aber boid fragst di sölba: "Ja, was is denn scho mei?" Ös dauat nöt lang, und du g'spürst as a g'schwind: Um d'Nasn waht iazat a andana Wind. Oamoi hast s'Glück, dann wieda s' Leid. Stad siagst as kemma, dö andanö Zeit. (OÖ Mundart)